Sjór og snjór flæða

Seinnipart gærdagsins þá varð töluvert sjóflóð á Sigló, há sjávarstaða gerði það að verkum að smábátar flutu nánast yfir bryggjur og sjór flæddi um nokkrar götur neðst á eyrinni.

Mér er ekki kunnugt um tjón að völdum þessa, en í gegnum tíðina þá hefur það gerst að sjór hafi flætt á land og oft á tíðum valdið miklu tjóni á íbúðar og atvinnuhúsnæði.

Félagar úr björgunarsveitinni, bæjarstarfsmenn og trillukallar voru að bjarga verðmætum og afstýra frekari tjóni. Svo gerðist það í morgun að snjóflóð féll í Ólafsfjarðarmúla og lokaði veginum.

Bæjarstjórn Fjallabyggðar hefur sent samgönguyfirvöldum erendi þess efnis að byggðar verði vegsvalir á þeim stað sem þessi snjóflóð eru hvað oftast að falla og eftir því sem ég best veit eru vegsvalirnar komnar á fjárlög.

það skipast skjótt veður í lofti ekki bara í fjármálaheiminum, fyrir nokkrum dögum síðan þá var ég á ferð um Lágheiði til Ólafsfjarðar og veður hið besta svo ákveðið var að skella sér á fyrsta vetrardag skemmtun í Ólafsfirði í kvöld, en því miður þá verður ekkert úr því, verð bara með þeim í huganum og vona að þeir skemmti sér vel sem þar verða.

Meðfylgjandi myndir eru fengnar af vef sksiglo