Davíð ók og Geir var farþegi um borð. Samfylkingunni var ekki boðið með.

Tekið af heimasíðu Valgerðar Sverrisdóttur  Össur hefur sagt um Valgerði að hún sé skæðasti stjórnarandstæðingur og hann sé hálf hræddur við hana, kannski ekki að ástæðulausu.

Atburðir dagsins eru dramatískir og alvarlegir. Þeir færa okkur heim sanninn um að allt er í heiminum hverfult og að enginn veit hvað átt hefur fyrr en misst hefur, svo að gripið sé til þekktra orðatiltækja.

Orð sérfræðingsins Richards Thomas hjá Merrill Lynch-bankanum, sem hann lét falla seinni partinn í júlí, rifjast upp fyrir mér við þessa atburði. Hann velti upp í alvöru hvort íslensk stjórnvöld ætluðu að halda að sér höndum þar til íslensku bankarnir væru svo illa staddir að hægt væri að þjóðnýta þá. Starfandi forsætisráðherra á þeim tíma, Þorgerður Katrín Gunnarsdóttir, sagði í framhaldinu að svona ummæli dæmdu sig sjálf og velti fyrir sér hvort einhverjar annarlegar hvatir lægju að baki svona staðhæfingu.

En hvað gerðist í dag?

Á meðan forsætisráðherra og formaður Sjálfstæðisflokksins var staddur í New York til að tala fyrir aðild Íslands að Öryggisráði Sameinuðu þjóðanna, gerðist ýmislegt hér heima. Í fyrsta lagi missti Ísland af þátttöku í gjaldeyrisskiptasamningum sem bandaríski Seðlabankinn gerði við nágranna okkar á Norðurlöndum. Stjórnvöld urðu tvísaga um það hvort reynt var að hoppa upp í þann vagn eða ekki. Eftir á að hyggja hefur túlkun efnahagsráðgjafa forsætisráðherra sennilega verið sú rétta, þ.e.a.s. að Seðlabanki Íslands hafi ekki viljað vera með.

Hafði hann önnur plön?

Í morgun greindi Davíð Oddsson, formaður bankastjórnar Seðlabankans, frá því að Glitnir væri kominn í þrot vegna erfiðrar lausafjárstöðu og að ríkið myndi eignast 75% í bankanum með kaupum á hlutafé upp á u.þ.b. 84 milljarða íslenskra króna. Gengið væri út frá genginu 5 en það stóð í 16 s.l. föstudag. Davíð greindi einnig frá því að eignasafnið væri gott og að forsvarsmenn Glitnis hefðu átt frumkvæði í málinu með því að leita til ríkisvaldsins. Í framhaldinu hefur stjórn Stoða (áður FL-group) óskað eftir greiðslustöðvun.

Þar er Baugur stór eigandi.

Í dag kemur fram í viðtali við formann stjórnar Glitnis að það hefði verið hægt að fara aðrar leiðir en þá sem farin var. Glitni hafi hins vegar einhverra hluta vegna verið hafnað um lán til þrautarvara gegn traustum veðum. Gjaldeyrisskiptasamningur, eins og sá sem Ísland missti af, hefði skipt máli í þessari stöðu.

Glitnir hafi einfaldlega verið settur í þá stöðu að hafa ekkert val.

Rétt er að hafa í huga að Alþingi samþykkti lántöku í vor upp á 500 milljarða króna til að styrkja gjaldeyrisvaraforða Seðlabankans. Einungis hluti þeirrar heimildar hefur verið nýttur og standa eftir af henni um 370 milljarðar króna. Ráðherrar hafa hælt sér af að taka ekki frekari lán vegna þess kostnaðar sem það hafi í för með sér.

Þess má geta að Byggðastofnun tók nýlega lán á góðum kjörum og fór létt með það.

Það vekur athygli að Landsbankinn gefur út yfirlýsingu í dag og fagnar aðgerðum stjórnvalda og telur þær skjótar og ákveðnar og beri vott um skýran vilja til þess að styrkja stoðir íslensks efnahagslífs og fjármálakerfis. Landsbankinn telur aðgerðina jákvæða auk þess sem hún muni leiða til tækifæra á frekari sameiningu fjármálastofnana hér á landi.

Einn af stjórnarmönnum í Landsbanka Íslands er Kjartan Gunnarsson fyrrverandi framkvæmdastjóri Sjálfstæðisflokksins.

Allt það sem hér er sagt gefur tilefni til efasemda um að nauðsynlegt hafi verið að fara þá leið sem farin var. Hvers vegna ætlar ríkið að kaupa 75% hlut í Glitni í stað þess að eyða lægri fjárhæðum af skattfé almennings í slíkar fjárfestingar og leysa málið að öðru leyti með lánveitingu ef þörf var á? Komast þarf til botns í því hvort nægjanlega traustar tryggingar voru ekki boðnar gegn slíkri lánveitingu.

Myndin sem birtist af lykilpersónum í málinu eftir fundarhöld í nótt var táknræn.

Alþjóðlegur Hjartadagur

Ég fékk bréf í síðustu viku frá Rannsóknarstöð Hjartavernd, það er meðal annars sagt frá því að 28. sept verður haldin um víða veröld sem Alþjóðlegur Hjartadagur.

Þetta var einnig fræðslu og hvatningarbréf um þær rannsóknir sem gerðar hafa verið og verið er að vinna í og hvatning til að huga betur að heilsunni.

Bréf þetta vakti mig til umhugsunar um líkamlegt ástand mitt og minna nánustu, vonandi á það við um fleiri. Í móðurætt minni er mikið um kransæðasjúkdóma og dó móður amma mín úr slíku.

Meðal annars segir í bréfinu " Eina leiðin fyrir þig til að fá vitneskju um hver er áhætta þín er að panta tíma hjá fagfólki sem mælir blóðþrýsting, stöðu kólesteróls og blóðsykurs, mælir mittismál og/eða reiknar út þinn þyngdarstuðul (BMI). Þegar þú veist áhættu þína geturðu hugsanlega tekið í taumana og dregið úr líkunum á að þú þróir með þér hjartasjúkdóma." Já þetta ætti að vera okkur öllum hjartans mál

Tekið af heimasíðu hjartaverndar

Hvernig er hjartvænn lífstíll?

Það er að byrja ekki að reykja eða hætta að reykja, það er aldrei of seint. Í boði eru
fjölda námskeiða í reykleysismeðferð og ýmis hjálparlyf.

Regluleg hreyfing hefur verulegan heilsufarslegan ávinning. Það hefur sýnt sig í rannsóknum að samtals hálftíma hreyfing á dag 5 daga vikunnar eða oftar dregur verulega úr líkum á því að fólk þrói með sér hjartasjúkdóm. Áhrif hreyfingar á hjarta- og æðakerfi eru fjölþætt; sterkari hjartavöðvi, aukið þol, blóðþrýstingur lækkar, jákvæð áhrif á blóðfitu einkum á góða kólesterólið, auðveldara að halda kjörþyngd bæði með aukinni brennslu og auknum grunnefnaskiptahraða. Regluleg hreyfing dregur úr líkum á offitu og ýmsum sjúkdómum, minnkar streitu og kvíða, bætir svefn og leiðir af sér betri almenna líðan. Til þess að fólk gefist ekki upp á reglulegri hreyfingu þarf að velja hreyfingu sem fólk hefur gaman af, nýta hreyfinguna í daglega lífinu s.s nota stigana, ganga í búðina eða til vinnu þar sem það er hægt.

Matarræðið er annar þáttur sem skiptir máli við hjartvænan lífstíl og við getum haft áhrif á. Þar eru EMMin þrjú sem þarf að skoða; rétta Máltíðamunstrið, rétta Magnið og rétti Maturinn. Varðandi máltíðarmunstrið þá er talað um að borða reglulega yfir daginn 4-5 máltíðir á dag. Hvað magnið snertir eru einfaldar reglur sem hægt er að styðjast við eins og að fá sér einu sinni á diskinn og halda sig við reglulegar máltíðir og borða lítið sem ekkert eftir kvöldverð. Margir fara út í að borða of lítið þe. borða of fáar hitaeiningar sem er ekki gott. Varðandi matinn er fjölbreytt fæði úr öllum fæðuflokkum án óþarfa fitu og sykurs talið heppilegast. Matardagbók er einfalt en afar gott hjálpartæki fyrir fólk til að skoða sitt máltíðamunstur, magn og hvað það er að borða.

 

Ljóðabærinn Siglufjörður

Það er mikill fengur fyrir bæjarfélag að hafa innan sinna raða eins skapandi listafólk eins og við erum svo heppin að hafa hérna á Sigló (Fjallabyggð). Brynja og Þórarinn eru bæði tvö með miklar og að mínu mati mjög góðar hugmyndir í þá átt að skapa bænum sérstöðu á landsvísu.

Glóð Ljóðahátíð 25.-27.september sem Þórarinn Hannesson stendur fyrir fer vel af stað. Leitast er við að virkja sem flesta svo sem nemendur í grunnskólanum og bæjarbúa, Þórarinn Eldjárn les úr verkum sínum og veitir verðlaun í ljóðasamkeppni Grunnskóla Siglufjarðar.

Í kvöld verður svo í Gránu aldarminning Steins Steinars dagskrá í tali og tónum um Stein steinar. Elfar Logi Hannesson og Þröstur Jóhannesson flytja ljóðleikinn Búlúlala, Örlygur Kristfinnsson fjallar um tíma Steins á Siglufirði, Þórarinn Eldjárn segir frá Steini og kveðskap hans og Þórarinn Hannesson flytur eigin lög við ljóð skáldsins.

Eftirfarandi er tekið úr fundargerð atvinnu og ferðamálanefndar. 

1.      Ljóðabærinn Siglufjörður - Brynja Baldursdóttir.     Brynja Baldursdóttir, myndlistamaður og hönnuður kynnti mjög svo nýstárlega hugmynd um að gera Siglufjörð að ljóðabæ.  Hugmyndin er að skreyta bæinn með sýnilegum ljóðum hvar sem er um bæinn, t.d. á gangstéttum, ljósastaurum, húsum, húsgögnum og nánast hvar sem er.  Þá væri hægt að setja upp brjóstmyndir af þjóðskáldunum.   Fundarmenn sammála um að fylgja þessari hugmynd úr hlaði og að skoða þetta mál frekar. Ljóðasetur Íslands - Þórarinn Hannesson.Þórarinn Hannesson mætti til fundarins og kynnti þar hugmynd sína að stofnun Ljóðaseturs Íslands á Siglufirði.  Byrjaði með ljóðakvöldi Glóa og hefur síðan vaxið og aukist.  Ljóðahátíð verður nú á næstunni og verða sérstakir gestir Þórarinn Eldjárn og Ari Trausti Guðmundsson.  Hugmyndin með ljóðasetrinu er að gera grein fyrir ljóðlistinni frá landnámi og til okkar daga.  Kynningar og fræðimenn fengju þarna möguleika til skoða ljóðlistina.  Þarna er hugmyndin að hafa ljóðabókasafn, ljóðabókasölu, kaffihorn og möguleika til að glugga í ljóðabækur, upplestrar og ljóðakvöld.    Reynt verður að opna fyrsta áfanga setursins á árinu 2009. 

Auglýsing um lambakjöt "steingeld"

Ég get ekki orða bundist yfir auglýsingu sem ég hef séð á skjánum núna í nokkur skipti. þetta er auglýsing um lambakjöt.

Það kemur karlmaður að kjötborði í verslun og sér þetta fína stykki af lambakjöti og ætlar að fá það, fyrir aftan hann er ung kona og heyrir hún afgreiðslumanninn segja að þetta er restin af lambakjötinu.  Nú eru góð ráð dýr (lömb) hún vill fá lambakjöt og til að ná því þá tekur hún það til bragðs að missa alveg óvart smápeninga úr peningaveskinu sínu.

Að sjálfsögðu þá verður maðurinn fyrir framan hana var við þetta og hún brosir sínu blíðasta og spyr hvort að hann geti ekki aðstoðaða? Karlmaðurinn gerir það og á meðan hann er að skríða eftir eyrinum þá tekur hún innpakkaða lambakjötið og hverfur á braut, ekki þarf að taka fram að afgreiðslumaðurinn er líka karlmaður.

Bíðum nú aðeins við hvað er verið að gefa í skin?

1. konur beita kynferði sínum til að ná sínu fram?

2. karlmenn eru kjánar og auðvelt að plata?

3. karlmenn eru kurteisir og aðstoða konur í nauð?

Ég verð að viðurkenna að auglýsingar af þessu tagi eru mér ekki að skapi, ég get nefnt fleiri dæmi en ætla ekki að fjalla nánar um það hér. 

Ég trúi ekki öðru en að framleiðendur auglýsinga geti gert betur þetta snýst jú um lambakjöt halló matur er þetta eitthvað flókið?

Þið megið hafa samband auglýsingaframleiðendur ef þið eruð í vandræðum og hafið ekki meira hugmyndaflug en raun ber vitni alla vega varðandi lambakjötið.

Af hverju sendu þeir ekki Davíð á Times Square?

Hvað vakir fyrir ráðherra forsætis með þessum gjörningi "Ísland var áberandi á Times Square í kvöld" ætli þessi mynd af fána vorum eigi að styrkja gengi krónunnar?

Ég var staddur á "samkomu" um helgina og þar voru meðal annarra nokkrir sjálfgræðis menn og það sem þeir voru ánægðir með upphlaup Davíðs í fjölmiðlum nokkrum dögum fyrr, ég vorkenndi þeim hálfpartinn að því leitinu til að þeir sakna Dabba kóngs ekkert smá. Það er eins og Sjálfgræðisflokkurinn sé foringjalaus þegar maður hlustar á marga flokksfélag, ætli það sé þá að rætast eins og segir í kvæðinu með Villa Vill .. og forsætisráðherrann er gamall IBM"

Já fáum Dabba kóng annan hvern dag í fjölmiðla og skammast útí öll þau fúlmenni sem eru að gambla með krónuna og þá styrkist hún kannski eilítið...

Forsætisráðherra á Nasdaq

Er að sjást til sólar í öllu niðurtalinu?

Þá er það staðfest ráðherra íþrótta og menntamála hefur boðað komu sína til okkar í Fjallabyggð 3. okt og þá verður skrifað undir samning um framhaldsskóla við utanverðan Eyjafjörð með höfuðstöðvar í Ólafsfirði. 

En þennan sama dag erum við með ársþing Eyþings sem haldið verðu að þessu sinni í litlu Reykjavík (Akureyri) gaman verður að fjölmenna með rútu í Ólafsfjörð og skrifa undir við ráðherra.

Með þessari undirritun þá er ljóst að stóriðja okkar íbúa við utanverðan Eyjafjörð fer af stað göngin verða að öllum líkindum opnuð í mars 2010 og þá ætti skólabyggingin að vera klár, en stefnt er á að skólinn hefji starfsemi haustið 2009.

Ég hlakka mikið til þegar tengingin á milli þessara byggðarkjarna verður að veruleika þá kemur margt til með að breytast í okkar daglega lífi og öll samskipti auðveldari.

Þannig að óhætt er að segja að við íbúar Fjallabyggðar förum að sjá ljósið í enda gangnanna og ljósið í öllu niðurtalinu verður að veruleika. Það er nú svo að margt jákvætt er að gerast í okkar litla samfélagi.

Horfum fram á veginn og höfum trú á samfélaginu okkar, tökum höndum saman og verum jákvæð tölum um það sem vel er gert og er að gerast.

Kaffi sötrandi krútt kynslóð

Ársþing SSNV var haldið á Siglufirði sl föstudag og hófst það kl 09 margt góðra gesta var á þinginu en það var það síðasta sem við Siglfirðingar sækjum. þegar kjördæmaskipanin var gerð og sameinað sveitarfélag Fjallabyggð varð til þá gekk Fjallabyggð í landshlutasamtökin Eyþing.

Ég hef síðastliðin tvö ár setið í stjórn SSNv fyrir hönd sveitarfélagsins og hefur það verið mjög ánægjulegt og lærdómsríkt svo ekki sé meira sagt, við sátum okkar síðasta stjórnarfund á fimmtudagskvöldið og var hann haldinn á Allanum. Á fundinum samdi stjórnin tillögu þess efnis að Fjallabyggð ætti fulltrúa á stjórnarfundum þegar málefni fatlaðra væru á dagskrá en við ætlum að halda því góða samstarfi áfram og útvíkka samninginn fyrir allt sveitarfélagið,  Ólafsfjörður hefur fengið þjónustuna frá Akureyri.

Ljóst er að samningu sá er sveitarfélögin innan SSNV hafa gert við ríkið er mjög góður og óhætt er að segja að vel hafi verið hugsað um skjólstæðinga þessa málflokks.

Skemmst er frá því að segja að tillaga okkar var samþykkt á þinginu og er þungu fargi af manni létt, nú er það okkar í sveitastjórn og starfsfólk félagsmála að koma með tillögur að þeirri þjónustu og framkvæmd sem við viljum sjá.

Á þingið komu nokkrir gestir meðal annarra ráðherra jórturdýra og fiska og einnig ráðherra faratækja og sveitarstjórnarmála, einnig kom Þorvaldur Lúðvík forstjóri Saga Capital og vægast sagt þá hristi sá ágæti maður miklu lífi í umræðurnar en hann fór yfir stöðu peninga mála á landinu kaldi í dag og svo kom hann einnig inná samgöngubætur milli landsbyggðar og höfuðborgar(borg óttans). en Þorvaldur er líka flugmaður og á sína eigin vél sem hann notar mikið hann gagnrýndi ráðmenn þjóðarinnar mikið fyrir að taka ekki hreina afstöðu varðandi staðsetningu Reykjavíkurflugvallar.

Hann sagði meðal annars að allt tal um staðsetningu á Hólmsheiði væri útúr kú, talaði sem flugmaður og áhugamaður um veðurfræði sagðist hafa sagt ráðmönnum borgarinnar að þeir þyrftu ekki að vera eyða meiri tíma og peningum að skoða þann möguleika. Hann sagði einnig að það ættu ekki heldur að vera "kaffi sötrandi krútt kynslóð" sem réði því eingöngu hvar flugvöllurinn væri staðsettur þetta er jú ekki einkamál íbúa borgar óttans, hún hefur ákveðnum skyldum að gegna fyrir landið allt.

Nú svo komu áðurnefndi ráðherrar í mýflugumynd og sögðu nokkur orð ráðherra sveitarstjórnarmála kom inná stærð sveitafélaga en eins og flestir vita þá nefndi hann töluna þúsund en aðspurður um þá tölu þá var svarið einfalt þetta er tala sem er svo oft nefnd(hvað svo sem það þýðir) Fiski og jórturdýra ráðherra kom svo inná kvótakerfið sem er svo gott að það er enginn fiskur eftir til að veiða og örfá fyrirtæki eiga kvótann svo að nýliðun í greininni er engin heldur fækkar ef eitthvað er og svo toppaði hann ræðu sína með umræðu um byggðakvótann hversu mikilvægur hann væri sjávarplássunum ja hérna hér.

Eftir nokkrar umræður var svo boðið í óvissuferð og fórum við með gesti okkar í Héðinsfjörð, bæjarstjórinn þurftir að skjótast í austurbæinn að taka á móti Baldri Ólimpíufara og gat því ekki verið með okkur í þeirri ferð, en fólk var mjög ánægt með að koma í Héðinsfjörð og verða vitni að þeirri samgöngubót sem göngin verða.

það var stoppað í nokkra stund í Héðinsfirði og síðan haldið heim á leið komið við í Bátahúsinu en þar tók bæjarstjórinn á móti hópnum allir nema ráðherrarnir þeir voru svo tímabundnir komu og þáðu léttar veitingar og skoðuðu safnið. Við enduðum svo kvöldið í mat á Allanum en það var alveg magnaður matur það ver ég að segja, svo var skemmt sér fammeftir nóttu svona flestir.

Þingið hófst svo á laugardagmorgni kl 09 og lauk kl 11:30. Það kom í minn hlut að kveðja þetta ágæta samstarf sem við höfum átt og óhætt er að segja að eftirsjá var af okkur hjá öllum þeim sem tóku til máls.

Ég fór síðan á Frímúrarafund kl 13 en ég er búin að vera félagi síðan 2005 og var 25 ára afmælisfundur stúku okkar Siglfirðing það var margt um manninn eða 55 gestir á fundinum og síða var veislumáltíð á Allanum. Þetta var reglulega góður fundur og gaman að sjá svona marga gesti hjá okkur. Halldóra yngir geimsteinninn minn hafði komið kvöldið áður norður og við áttum svo góða kvöldstund á laugardagkvöldinu saman.

Þorsteinn Pálsson málefnaleg skrif.......

Ég rakst á þessa grein á visir.is eftir fyrrverandi formann Sjálfstæðisflokksins Þorstein Pálsson. Ég ætla að hrósa Þorsteini fyrir þessi skrif sín í garð Framsóknarflokksins en í grein sinni dregur hann upp ansi góða mynd að þeirri vinnu sem við framsóknarfólk erum að vinna í okkar röðum, svo er að sjá hvort að þessi vinna eigi ekki eftir að skila okkur auknu fylgi í næstu kosningum.

Þorsteinn Pálsson skrifar:

Framsóknarflokkurinn er næst minnstur á Alþingi. Eigi að síður er það svo að hann er eini stjórnmálaflokkurinn sem lagt hefur verulega vinnu í málefnalegar úttektir innan eigin veggja vegna álitaefna sem tengjast hugsanlegri aðild að Evrópusambandinu og Evrópska myntbandalaginu.

Samfylkingin er eini stjórnmálaflokkurinn sem hefur aðild á dagskrá. Hún hefur hins vegar ekki lagt sambærilega innanbúðar vinnu til grundvallar þeirri stefnumörkun.

Spurningar hafa því eðlilega vaknað hvort Samfylkingin er nægjanlega undir það búin að taka á öllum þeim flóknu viðfangsefnum sem upp koma í tengslum við hugsanlega aðild.

Að þessu leyti er sérstaða Framsóknarflokksins talsverð. Hann hefur ekki tekið afstöðu til aðildar. En á hinn bóginn hefur hann undirbúið umræðuna af nokkurri kostgæfni. Ekki fer á milli mála að þar býr flokkurinn að þeirri málefnalegu arfleifð sem Halldór Ásgrímsson skildi eftir sig.

Guðni Ágústsson núverandi formaður Framsóknarflokksins kynnti í gær til sögunnar skýrslu sem unnin hefur verið á vegum flokksins um peningamálastefnuna og möguleikana á að taka upp nýjan gjaldmiðil. Alkunnugt er að formaðurinn hefur verið efasemdarmaður um breytingar á þessu sviði. Því meiri ástæða er til að virða að slík málefnavinna skuli halda áfram undir hans forystu. Það ber hyggindum vitni.

Fyrir rúmum tveimur árum birti Framsóknarflokkurinn skýrslu á grundvelli ítarlegrar málefnavinnu um samningsmarkmið Íslands. Sú skýrsla var unnin í þeim tilgangi að flokkurinn yrði undir það búinn að aðildarspurningin kæmi á dagskrá. Nú er þeirri vinnu fylgt eftir með dýpri skoðun á gjaldmiðilsspurningum og peningastefnunni.

Nýja skýrslan hefur ekki að geyma ákveðnar tillögur. Hún dregur einfaldlega fram þá kosti sem fyrir hendi eru með skýrum og afgerandi hætti. Um leið er hún mikilvægt og þakkarvert pólitískt framlag til þeirrar umræðu sem nú fer fram um þetta stærsta álitaefni í íslenskum stjórnmálum.

Á þessu stigi er hins vegar of snemmt að segja til um hvort skýrslan hefur varanlegt pólitískt gildi eða er líkleg til að breyta vígstöðunni á taflborði stjórnmálanna. Það ræðst vitaskuld mest af því hvaða ályktanir Framsóknarflokkurinn sjálfur kemur til með að draga af henni við eigin stefnumótun.

Við síðustu kosningar gerði Samfylkingin Evrópumálin hvorki að kjarnaatriði í stefnuskrá sinni né úrslitaatriði við stjórnarmyndun. Niðurstaðan varð sú að Samfylkingin féllst á að aðildarspurningin kæmi ekki á dagskrá á þessu kjörtímabili. Eins og sakir hafa staðið hefur fátt bent til að Samfylkingin væri líkleg til að gera Evrópusambandsaðild að skilyrði fyrir stjórnarþátttöku við næstu kosningar. Afdráttarlaust skilyrði þar um yrði ugglaust talið þrengja kosti flokksins of mikið.

Í baklandi Sjálfstæðisflokksins er þung krafa um evruna uppi á borðum. Skýr og afdráttarlaus stefnumótun af hálfu Framsóknarflokksins um evru og aðild að Evrópusambandinu gæti í þessu ljósi sett gaffal á báða stjórnarflokkana fyrir næstu kosningar. Velji flokkurinn á hinn bóginn krónukostinn eru minni líkur á að hann geti notað stefnuna í peningamálum til að breyta stöðu sinni á taflborði stjórnmálanna. Þá þarf hann að finna önnur mál til þess.

Þrátt fyrir fagurgala Geirs og Ingibjargar

"við vorum bara að ræða málin" segir formaður ljósmæðrafélagsins, já en bíddu er það ekki undirstaða þess að ná samningum þ.e.a.s. tala saman?

Ég skil ekki þessa tregðu forsvarsmanna Þessara tveggja ríkisstjórna sem eru í landinu það á að leiðrétta laun ljósmæðra og það strax, það eru að minnsta kosti forsvarsmenn ríkisstjórnanna tveggja sammála um, og hafa ráðherrar úr báðum stjórnum lýst yfir stuðningi við ljósmæður. En hvað er þá að, er þetta bara fagurgali og fuglasöngur og engin alvara mar bara spyr sig?

Samningar náðust ekki í dag

Össur opnaði heimasíðu Midnight Sun Race

Það var glæsileg kynning hjá Sigmari B. Haukssyni í Bátahúsinu á föstudagskvöldinu en eins og áður hefur komið fram þá er Sigmar að vinna í verkefninu "Siglufjörður miðstöð Skútusiglinga við Ísland"

Óhætt  er að segja að Sigmar hafi unnið góða vinnu eins og fram kom í kynningunni, svo var rekki leiðinlegt að fá ráðherra byggðarmála til að opna formlega heimsíðu verkefnisins.

Tekið af heimsíðunni

The Iceland Midnight Sun Race is a unique yacht race – the only one of its kind in the North Atlantic. The first competition will be held on 20 June 2009, a time when the sun stays aloft around the clock!

The 75-nautical-mile race starts in the town of Siglufjörður in North Iceland, and winds around Grimsey Island, which is traversed by the Arctic Circle. The shortest line from Scotland to Iceland is about 440 nautical miles. The distance Iceland's capital, Reykjavík, to Siglufjörður is 286 nautical miles, a route lined with majestic landscapes and filled with diverse marine life. The competition is divided into three categories:
32 – 40-foot vessels
40 – 50-foot vessels
50 foot vessels and bigger

Skoðið  www.icesun.is