Fjallabyggð við tökum vel á móti þér/ eða hvað?

Helgina 2. -3. október 2010 var mikil hátíð í Fjallabyggð Héðinsfjarðargöng voru vígð og sveitarfélagið bauð í kaffi og meðlæti. Það var mikill fjöldi samankominn í Fjallabyggð þessa helgi enda mikið um að vera og eftirvæntingin að fara í gegnum Héðinsfjarðargöng mjög mikil. Í Héðinsfirði var áætlað að við vígsluna hafi verið um tvö þúsund manns og fjöldi þeirra sem fóru í kaffiboðið í íþróttahúsið í Ólafsfirði var hreint ævintýralegur. Þetta gekk alveg ágætlega fyrir sig og hef ég ekki heyrt annað en allir hafi fengið að smakka á kræsingunum, sumir kannski meira en aðrir en er það ekki alltaf svo?

Mikil gleði var í báðum bæjarhlutum austur og vesturbæ veitingastaðir opnir og fjöldinn allur af fólki að gera sér glaðan dag. Á sunnudeginum var umferðaþunginn mikill bíll við bíl allan daginn enda veðrið með því besta sem hægt er að hugsa sér það var eins og góður sumardagur.

Siglfirðingar hafa í gegnum tíðina þótt höfðingjar heim að sækja og gestrisnir með eindæmum. Á sunnudeginum þegar sveitarfélagið býður heim og fjöldi gesta mjög mikill þá ákveða einhverjir bæjarstarfsmenn að taka af kalda vatnið af bænum um morguninn og fram eftir degi.  Já og það á sunnudeginum sem er fyrsti dagur eftir opnun gangnanna og eins og áður segir bærinn smekkfullur af gestum. Þetta þýddi það að það var ekki hægt að hleypa niður úr klósettum og sundlaugin lokuð ekkert kalt vatn. 

Nú veltir maður því fyrir sér hvað veldur því að þessi tiltekni sunnudagur er valinn til þess að taka kalda vatnið af bænum?

Helgina eftir er sama blíðan og stöðugur straumur í gegnum göngin ekki reyndist hægt að leigja þau undir spjótkast eða keilu eins og Spaugstofumenn létu í veðri vaka í sínum fyrsta þætti á stöð 2.

En hvað gerist þá jú tvö mjög vinsæl veitinga og kaffihús Hannes Boy og Harbor Café eru lokuð. Fólk vafraði um bryggjusvæðið sem er orðið hið huggulegasta og tóku á dyrahúnum en allt kom fyrir ekki það er LOKAÐ. Einhverjir fóru og fengu sér kaffi á Torginu og Allanum en bakaríið var líka LOKAÐ. Bensínstöð Olís var hinsvegar opin og var mér sagt að í gær sunnudag þá hafi verið 20 mín bið eftir kaffi slíkt var álagið. http://www.sksiglo.is/is/news/i_sol_og_sumaryl_2

Já Olís vinur við veginn stóð alveg undir merkjum í gær í það minnsta. Ég fékk símtöl frá gestum sem voru að koma til Siglufjarðar í heimsókn og skoða göngin og Héðinsfjörð í fyrsta skipti og ætla ég ekki að hafa eftir þau orð sem fólkið viðhafði varðandi opnun á veitingastöðum og bakaríi. í framhaldi af þessum uppákomum þá velti ég því fyrir mér hvort að þetta sé það sem koma skal. Og sveitarfélagið geti breytt um slagorð?  

Fjallabyggð við viljum ekki gesti.