Loka sprenging í Héðinsfjarðargöngum í dag,,,

Héðinsfjarðargöng loka sprenging.   

Nú, þann 9. Apríl, verður hátíð í Fjallabyggð vegna loka sprengingar  Héðinsfjarðarganga. Þá verður haldið upp á þann áfanga að náðst hefur að sprengja göng í gegn milli Ólafsfjarðar og Héðinsfjarðar, 6,9 km leið. Búið er að sprengja göng milli Siglufjarðar og Héðinsfjarðar 3,7 km og var því verki lokið 3 apríl 2008.Verkið er unnið af Háfelli og tékkneska verktakafyrirtækinu Metrostav. Tugir tékka frá Metrostav hafa unnið við göngin og hafa þeir verið afar vinnusamir og þægilegir á allan máta. Á sínum tíma voru samgöngur til Ólafsfjarðar og Siglufjarðar torsóttar. Úrbót varð árið 1967 þegar Strákagöng voru opnuð til Siglufjarðar og árið 1990 Þegar göng um Ólafsfjarðarmúla voru tekin í notkun. Nú sér fyrir endann á tengingu þessara tveggja byggðakjarna þegar Héðinsfjarðargöng klárast um mitt ár 2010. Frá þeim tíma munu íbúar Fjallabyggðar ekki þurfa að reiða sig á Lágheiðina sem á það til að vera ófær eða torsótt stórann hluta vetrar.   

Mikilvæg samgöngubót. 

Nýju Héðinsfjarðargöngin munu hafa afgerandi jákvæð áhrif á samfélagið í Fjallabyggð og voru í reynd forsenda þess að  þessi fyrrum sveitarfélög á svæðinu sameinuðust í eitt Fjallabyggð. Sú sameining hefur gengið vel fyrir sig en mun ekki nýtast að fullu fyrr en göngin opna. Jarðgöngin munu einnig efla þéttbýliskjarnana við Eyjafjörð sem eitt atvinnusvæði, hafa jákvæð áhrif uppbyggingu framhaldsskóla við utanverðan Eyjafjörð, en tillögu um slíkan skóla flutti Birkir J. Jónsson, alþingismaður,en eitt af fyrstu verkum núverandi menntamálaráðherra Katrínar Jakobsdóttur var að skrifa undir samning um stofnun framhaldsskóla við utanverðan Eyjafjörð með höfuðstöðvar í Ólafsfirði. Reikna má með að framkvæmdir við uppbyggingu skólans geti hafist nú í vor. Að auki munu göngin hafa mjög góð áhrif á ferðaþjónustuna á Norðurlandi öllu. Nú þegar hefur verið unnið að undirbúa samstarf heilbrigðisstofnana á svæðinu og annarra slíkar þjónustu sem veitt er á Siglufirði og í Ólafsfirði. Ljóst er því að göngin skapa nýtt og langþráð sóknarfæri í byggðamálum Tröllaskagans og Eyjafjarðarsvæðisins.  

Eljusamir frumherjar 

Árið 1990 lagði frumherjinn Sverrir Sveinsson, Framsóknarflokki, fyrst fram þingsályktunartillögu um jarðgöng milli Ólafsfjarðar og Siglufjarðar í framhaldi af opnun jarðganga um Ólafsfjarðarmúla. Meðflutningsmenn Sverris að tillögunni voru Halldór Blöndal, Jón Sæmundur Sigurjónsson, Jóhannes Geir Sigurgeirsson, Ragnar Arnalds, Árni Gunnarsson og Pálmi Jónsson. Hafa þessir menn alla tíð stutt göngin af eljusemi. Þótt á engan sé hallað skal einnig nefnt að tveir menn, þeir Halldór Ásgrímsson og Davíð Oddsson, áttu afgerandi þátt í að verkinu var hrundið í framgang. Samgönguráðherrar á hverjum tíma hafa einnig lagt sitt lóð á vogarskálarnar ásamt heimamönnum, nú síðast Kristján L. Möller. Það er að rætast stór draumur og er tilhlökkunin mikil að fá almennilegar samgöngubætur á milli þessara svæða og að Siglufjörður og Ólafsfjörður eru ekki lengur endastöð.    

Hermann Einarsson, bæjarfulltrúi í Fjallabyggð. 

Athugasemdir

[Hólmfríður Bjarnadóttir, 10.4.2009 kl. 08:42]

Til hamingju Fjallabyggð og til hamingju Ísland

[Jóhanna Guðm. (IP-tala skráð) 11.4.2009 kl. 21:59]

Til hamingju Fjallabyggð með göngin.

Þetta er frábært nú verður maður að hætta að hafa það sem afsökun að sé svo langt til Siglufjarðar.

Kveðja frá Egilsstöðum

Jóhanna Guðm.